Vilja leyfa það aftanfrá

Þingið í Singapore vill afnema bann við munn- og endaþarmsmökum. Þó ekki fyrir samkynhneigða. Hingaðtil hefur verið blátt bann við slíkum leikjum jafnvel innan veggja heimilisins. Hvort sem gagnkynhneigð eða samkynhneigð pör hafa átt í hlut.

Fyrir þinginu liggur nú frumvarp um að breyta þessu og ýmsu öðru í sambandi við kynlífsathafnir í landinu. Samneyti samkynhneigðra verður áfram bannað, þótt enginn hafi verið sóttur til saka fyrir slíkt mörg undanfarin ár.

Þingið vill einnig herða reglur um vændi og hinn svokallaða kynlífs-túrisma. Vændi er leyft í Singapore en þingið vill setja reglur um að ekki megi kaupa kynlíf af stúlkum undir 18 ára aldri. Við slíku á að liggja sjö ára fangelsi.

Það á einnig að sníða þrengri stakk þeim ferðaskrifstofum sem halda uppi kynlífsferðum til Singapore. Ef þær gera út á vændiskonur undir 18 ára aldri liggur við tíu ára fangelsi, ef frumvarpið verður samþykkt.