Crawford kominn með starfsleyfi á ný

NBA-dómarinn Joey Crawford hefur fengið grænt ljós á að byrja að dæma í deildinni á ný í haust, en hann var settur í bann á síðasta tímabili eftir að hafa farið gróflega yfir strikið í leik San Antonio og Dallas.

Crawford er einn reyndasti dómarinn í NBA en hann var settur í bann eftir að hann bauð Tim Duncan hjá San Antonio að slást við sig og rak hann af velli fyrir litlar sakir. Forseti deildarinnar hefur gefið út að Crawford hafi tekið sig saman í andlitinu og leitað sér aðstoðar og sé því tilbúinn að hefja störf á ný. Hann hefur dæmt fleiri leiki í úrslitakeppni en nokkur annar starfandi dómari í NBA deildinni.