Fasteignalánin bíta í afkomu UBS

Svissneski alþjóðabankinn UBS greindi frá því í dag að hann þurfi að afskrifa fjóra milljarða svissneskra franka, jafnvirði 211 milljarða íslenskra króna, vegna tapaðra útlána á bandarískum fasteignalánamarkaði. Þetta mun skila sér í því að bankinn tapar á bilinu 600 til 800 milljónum franka á þriðja ársfjórðungi.

Þetta er fyrsti fjórðungur bankans í rúm tvö ár sem hann skilar tapi af útlánadeild sinni.

Stjórnendur bankans segja niðurstöðuna óviðunandi og hafa fyrirskipað að allt að 1.500 manns verði sagt upp auk þess sem breytingar verða gerðar á stjórnendateymi bankans.