Hamilton verður ekki refsað

Lewis Hamilton verður ekki refsað fyrir aksturslag sitt í síðustu keppni Formúlunnar í Japan um síðustu helgi.

Eins og kom fram hér á Vísi í morgun fundaði aganefnd Alþjóðaaksturssambandsins um hvort að grípa ætti til aðgerða vegna þeirra atburða sem urðu til þess að Sebastian Vettell ók aftan á Mark Webber.

Myndband sem kom fram á Youtube virtist gefa til kynna að Hamilton hafi ekið glæfralega og boðið hættunni heim.

Talið var að Hamilton ætti það á hættu að missa þau tíu stig sem hann vann sér inn í keppninni en hann hefur tólf stiga forystu í stigakeppni ökuþóra þegar tvær keppnir eru eftir á tímabilinu.

Vettell hafði verið refsað fyrir athæfið með því að dæma hann aftur um tíu sæti á ráspól í næstu keppni. Sá dómur hefur nú verið afturkallaður og Vettell aðeins áminntur.