Mega skoða berar stelpur

Kristnir þrýstihópar í Bandaríkjunum eru æfir yfir því að varnarmálaráðuneytið hefur ákveðið að leyfa að tímarit eins og Playboy og Penthouse verði seld í herstöðvum sínum. Árið 1996 voru sett lög sem bönnuðu sölu á klámvarningi í herstöðvum.

Nefnd varnarmálaráðuneytisins hefur úrskurðað að fyrrnefnd tímarit og raunar mörg fleiri flokkist ekki undir klámrit. Alls voru lögð fyrir nefndina 473 tímarit til þess að úrskurða um. Sextíu og sjö prósent þeirra þóttu ekki eiga heima í herstöðvum, en hin voru leyfð.

Þessu vilja klámandstæðingar ekki una. Þeir ætla að hrinda af stað undirskriftasöfnun til þess að fá þingið til að skipa ráðuneytinu að fara að lögum.

Ekki eru allir sammála andstæðingunum. Þeim finnst að ungir menn sem eru sendir til annarra landa til þess að berjast fyrir þjóð sína eigi að ráða því sjálfir hvað þeir lesa. Og skoða.