Hleb bráðum kynntur sem leikmaður Barcelona

Barcelona mun á komandi dögum tilkynna um kaup á miðjumanninum Alexander Hleb frá Arsenal. Frá þessu er greint á vefsíðu Sky.

Framtíð Hleb á Emirates vellinum hefur verið í lausu lofti síðan síðasta tímabili lauk og hann hefur m.a. verið orðaður við Inter. Barcelona hefur lengi haft áhuga á Hleb. Þessi Hvít-Rússi er á leið til Spánar til að gangast undir læknisskoðun en félögin tvö hafa víst náð samkomulagi um kaupverðið.

Hleb verður fimmti leikmaðurinn til að ganga til liðs við Börsunga í sumar. Hann gekk til liðs við Arsenal fyrir 11,2 milljónir punda árið 2005 og hefur hann skorað tíu mörk í 130 leikjum fyrir félagið.