Lil Wayne með átta Grammy-tilnefningar

Bandaríski rapparinn Lil Wayne hefur verið tilnefndur til átta Grammy-verðlauna fyrir plötu sína Tha Carter III. Platan er jafnframt sú vinsælasta á árinu vestanhafs.

Coldplay fékk næstflestar tilnefningar, eða sjö talsins, fyrir plötu sína Viva La Vida. Næst á eftir komu Jay-Z, Ne-Yo og Kanye West með sex tilnefningar hver. Fimm tilnefningar fengu Alison Krauss, John Mayer, Robert Plant, Radiohead og Jazmine Sullivan. Næst á eftir komu Adele, Danger Mouse og Eagles með fjórar tilnefningar. Verðlaunin verða afhent í alls 110 flokkum hinn 8. febrúar í Staples Center í Los Angeles.

Lil Wayne, sem heitir réttu nafni Dwayne Michael Carter Jr., fæddist árið 1982. Hann vakti töluverða athygli fyrir sína fyrstu sólóplötu, Tha Block Is Hot, sem kom út árið 1999. Eftir að hann gaf út Tha Carter árið 2004 varð hann enn vinsælli og síðan þá hefur hann gefið út Tha Carter II og loks Tha Carter III.