Hamilton heiðraður í Bretlandi

Lewis Hamilton var valinn besti alþjóðlegi ökumaðurinn í kappakstri á sérstakri hátíð Autosport tímaritsins í Bretlandi á sunnudagskvöld.

Tímaritið er það virtasta í akstursíþróttageiranum og velur ökumenn í ýmsum mótaröðum og síðan besta ökumann yfir heildina og á heimsvísu.

Hamilton stóð einmitt á sama sviði þegar hann var unglingur og hvíslaði í eyrað á Ron Dennis að hann ætlaði að verða kappakstursökumaður hjá McLaren þegar hann yrði stór.

Dennis hrefist svo af guttanum að hann studdi hann til afreka í minni mótaröðum upp frá þessari stundu. Hamilton og Dennis urðu síðan heimsmeistarar á þessu ári, eftir harða keppni við Felipe Massa og Ferrari.

Hamilton er einnig tilnefndur sem íþróttamaður ársins í Bretlandi og það kjör verður á BBC um næstu helgi. Fyrst tekur Hamilton þátt í viðburðum á Wembley þar sem Race of Champions fer fram. Það er mót margra af bestu ökumönnum heims og verður sýnt beint á Stöð 2 Sport.