Villarreal samþykkir tilboð Barcelona í Caceres

Barcelona tilkynnti á heimasíðu sinni í dag að félagið hefði komist að samkomulagi við Villarreal um kaup á varnarmanninum Martin Caceres.

Kaupverðið nemur 16,5 milljónum evra eða tæpum tveimur milljörðum króna. Nú þarf félagið að semja við Caceres um kaup og kjör en talið er að hann muni semja við Barcelona til fjögurra ára.

Nú þegar hefur Pep Guardiola, nýr knattspyrnustjóri Barcelona, fengið tvo nýja leikmenn til félagsins, þá Seydou Keita og Gerard Pique, og er Barcelona nú sterklega orðað við Daniel Alves og Alexander Hleb.