Þrengingunum ekki lokið

Lausafjárkreppunni er fjarri því að vera lokið og engin teikn á lofti að það versta sé yfirstaðið. Þetta segir Jean-Claude Trichet, bankastjóri evrópska seðlabankans.

Trichet, sem sat fyrir svörum í breska ríkisútvarpinu í dag, sagði varasamt að lækka stýrivexti í því árferði sem nú einkenni helstu hagkerfi heimsins. Hann líkti ástandinu við niðursveifluna á áttunda áratug síðustu aldar en þá rauk olíu- og matvælaverð verð upp í hæstu hæðir á heimsmörkuðum.

Hann rifjaði upp að á þeim tíma hafi seðlabankar heimsins lagst á eitt að bæta ástandið með aðhaldi og haldið fast peningamálastefnu sína. Efnahagslífið hafi hins vegar ekki fylgt eftir. Laun hafi hækkað og atvinnuleysi aukist. Í kjölfarið hafi dregið úr samkeppnishæfni Evrópuríkja og sé álfan enn að súpa seyðið af því.