Þingmenn efast um björgunaraðgerðirnar

Gengi hlutabréfa lækkaði almennt á bandarískum hlutabréfamarkaði í dag en fjárfestar þykja sjá vísbendingar þess efnis að björgunaraðgerðir bandarískra stjórnvalda til að sveigja framhjá samdráttarskeiði vestanhafs muni ekki hljóta brautargengi hjá bandarískum þingheimi. Henry Paulson, fjármálaráðherra Bandaríkjanna, Ben Bernanke, seðlabankastjóri og Christopher Cox, forstjóri bandaríska fjármálaeftirlitsins, sátu fyrir svörum bankamálanefndar bandaríska þingsins í langan tíma í dag og reyndu að fullvissa þingheim um nauðsyn aðgerðanna. Þeir lögðu meðal annars á það þunga áherslu að til lengri tíma litið myndi kostnaðurinn ekki verða jafn hár og ef ekkert yrði að gert. Talað hefur verið um að kostnaðurinn við ruslakistuna fyrir undirmálslánabréf og aðra verðlausa fjármálagjörninga sem bandarísk fjármálafyrirtæki sitja uppi með og brennir gat í efnahagsreikning þeirra muni kosta bandaríska skattgreiðendur um 700 milljarða bandaríkjadala. Dow Jones-hlutabréfavísitalan lækkaði um 1,47 prósent og Nasdaq-vísitalan um 1,18 prósent.