Dregur úr hagvexti á Indlandi

Hagvöxtur hefur dregist saman á Indlandi, einu af þeim nýmarkaðslöndum þar sem vöxturinn hefur verið hvað mestur fram til þessa. Vöxturinn hefur ekki verið minni í þrjú ár.

Hagvöxtur mældist 7,9 prósent á öðrum ársfjórðungi samanborið við 9,2 prósent á sama tíma í fyrra. Til samanburðar mældist hagvöxturinn 8,8 prósent á fyrsta fjórðungi ársins.

Breska ríkisútvarpið hefur eftir indverskum hagfræðingum að hátt olíu- og matvöruverð samhliða háu stýrivaxtastigi muni draga frekar úr hagvexti það sem eftir lifi árs og fari hann á endanum í 7,5 prósent.

Indverski seðlabankinn hefur hækkað stýrivexti jafnt og þétt til að koma böndum á verðbólguna. Vextirnir standa nú í níu prósentum á sama tíma og verðbólga mælist 12,4 prósent. Á sama tíma í fyrra mældist verðbólgan hins vegar einungis fjögur prósent, að sögn BBC.