Massa ánægður með stöðuna, Hamilton vígareifur

Felipe Massa varð í öðru sæti á seinni æfingu keppnisliða í dag, en Lewis Hamilton níundi. Sálfræðin hefur sitt að segja í yfirlýsingum beggja kappa og Hamilton ekki á því að draga úr þó honum hafi raunverulega ekki gengið vel. Hann er ánægður með bílinn.

Hamilton var í basli með bílinn á miðkafla brautarinnar og læsti bremsum hvað eftir annað. "Bíllinn var eldfljótur, þrátt fyrir kuldann. Brautin var hál og við einbeittum okkur mest að þolakstri fyrir kappaksturinn, ekki spretthörku. Ég skemmdi dekkinn í tvígang, en tel að breyting sem við gerðum á bílnum muni bæta gengi okkar á morgun", sagði Hamilton.

Massa var frísklegri en Hamilton eftir æfinguna, eftir að hafa misst besta tíma til Fernando Alonso. "Þetta er frábær byrjun á helginni. Bíllinn er mjög öflugur og við erum fljótir. Í síðasta móti var Hamilton fljótastur á föstudegi og vann mótið. Kannski leggur þetta línurnar fyrir helgina", sagði Massa.

"Okkur gekk vel að stilla bílnum upp fyrir brautina, en kannski McLaren geti bætt sig. Það þarf margt að ganga upp svo ég verði meistari. Ég þarf á því að halda að BMW og Renault verði öflugir og blandi sér í toppslaginn, eins og Alonso gerði í dag", sagði Massa.

Þriðja æfingin á Interlagos brautinni verður á morgun í beinni útsendingu á Stöð 2 Sport kl. 12.55 á laugardag og tímatakan í opinni útsendingu kl. 15.45.

Sjá meðaltal í tímatökum og brautarlýsingu