Hlutabréf féllu í Bandaríkjunum

Gengi hlutabréfa féll á bandarískum hlutabréfmörkuðum rétt undir lok viðskiptadagsins á Wall Street í dag. Helsta skýringin á falli dagsins eru veðköll og nauðungarsala á hendur vogunarsjóða og annarra fjárfesta. Associated Press-fréttastofan hefur eftir Alfred E. Goldman, helsta sérfræðingi bandaríska verðbréfafyrirtækisins Wachovia, að órói á hlutabréfamörkuðum skýrist af taugaveiklun í röðum fjárfesta sem viti ekki hvert stefni í efnahagsmálum. Hann segir taugaveiklunina svo mikla nú um stundir, að lítið þurfi til þess að fjárfestar selji bréf sín. Bankastjórn bandaríska seðlabankans mun funda um næstu aðgerðir á morgun en flestir búast við að bankinn lækki stýrivexti á miðvikudag um allt að eitt prósent. Þá er reiknað með að evrópski seðlabankinn grípi til sömu ráða í næstu viku til að takast á við hremmingar á fjármálamörkuðum. Dow Jones-hlutabréfavísitalan féll um 2,4 prósent og endaði í tæpum 8.176 stigum. Þá féll Nasdaq-vísitalan um 2,97 prósent og endaði í 1.505 stigum. Vísitölurnar hafa ekki verið lægri síðan á vordögum 2003.