Bryndís á afmælistónleikum

Í kvöld mun leik- og söngkonan Bryndís Ásmundsdóttir halda tónleika á DOMO í tilefni afmælis síns. Bryndís steig sín fyrstu spor á sviði í Íslensku óperunni tólf ára að aldri í hlutverki Soffíu í Litla sótaranum í leikstjórn Þórhildar Þorleifsdóttur. Þaðan lá leiðin í leikhópinn Gamanleikhúsið, sem stofnaður var af Magnúsi Geir Þórðarsyni, þar sem hún lék m.a. í sýningunum Kötturinn sem fer sínar eigin leiðir, Gúmmí Tarzan og Línu langsokk.

Eftir stutta viðdvöl í Söngskólanum í Reykjavík ákvað Bryndís að helga sig djass- og blússöng. Aðeins sautján ára kynntist hún Guðmundi Steingrímssyni - Papa Jazz - og félögum og hóf að syngja með þeim á öldurhúsum bæjarins, en 19 ára fór hún ásamt Papa Jazz og Mr. Ragtime Bob Darch í hljómleikaferðalag um Bandaríkin að syngja á Ragtime Jazz Festval. Í kjölfarið lék hún hlutverk Ragtime Lil í söngleiknum „Ragtime Lil and Banjo Banjo show" í Branson Missouri.

Árið 2003 útskrifaðist Bryndís úr Leiklistarskóla Íslands og árið 2006 úr Complete Vocal Technique. Bryndís hefur tekið þátt í þó nokkrum uppfærslum á Broadway í Reykjavík, en meðal þeirra eru Prímadonnushowið, Rolling Stones show, Nína og Geiri, Bó Hall showið og Tina Turner tribute show. Bryndís hefur verið skemmtikraftur og söngkona með nokkrum hljómsveitum í tólf ár. Um þessar mundir fer hún með hlutverk Janis Joplin ásamt Ilmi Kristjánsdóttur, í uppsetningu Íslensku óperunnar um söng­konuna.- pbb