Gunnlaugur verður með Formúluna á Sýn

Sjónvarpsstöðin Sýn hefur senn beinar útsendingar frá Formúlu 1 kappakstrinum. Gunnlaugur Rögnvaldsson hefur verið ráðinn umsjónarmaður útsendinganna en hann hefur sinnt Formúlu 1 umfjöllun á Íslandi á þriðja áratug, ýmist fyrir dagblöð, tímarit eða sjónvarp.

„Formúlan hefur á liðnum árum áunnið sér sess sem eitt allra vinsælasta íþróttaefni í íslensku sjónvarpi og hyggst Sýn stórefla umfjöllunina," segir í tilkynningu frá stöðinni. „Fyrsta beina útsendingin verður frá Ástralíu um miðjan mars. Fyrir þann tíma verða ýmsir þættir um Formúlu 1 á dagskrá á Sýn, en samtals eru 18 Formúlu 1 mót á dagskrá í ár. Keppt verður á tveimur nýjum brautum og í báðum tilfellum er um kappakstur inn í miðri borg að ræða. Keppt verður í Valencia á Spáni og þá verður ekið um götur Síngapúr, þar sem ekið verður á flóðlýstri braut í fyrsta skipti í náttmyrkri."

„Ég er mjög spenntur á að takast á við nýjan starfsvettvang og að geta víkkað umfjöllun um Formúlu 1 til muna. Það verða margar spennandi nýjungar á Sýn, sem verið er að leggja grunn að þessa dagana", sagði Gunnlaugur um ráðninguna.

„Ég hef gengið með ýmsar hugmyndir í maganum sem ekki hefur verið hægt að útfæra til þessa á Íslandi, en það er hugur í Sýnar-mönnum. Við munum heimsækja ökumenn, lið og mótsstaði á árinu og kynda hressilega undir byrjun tímabilsins með þáttum um undirbúning keppnisliða fyrir tímabilið.

Taka púlsinn og vera á staðnum. Þá stendur til að virkja áhorfendur meira í umfjöllun um Formúlu 1 og skapa stemmningu þar að lútandi um land allt með gestum í sjónvarpssal, viðtölum út á landi og leikjum ýmis konar, fyrir áhorfendur á öllum aldri. Ég lýsi hér með eftir áhugasömum börnum, uglingum, konum og körlum til að taka þátt í herlegheitunum", sagði Gunnlaugur.Útsendingarnar á Sýn verða í náinni samvinnu við vefsetrið http://kappakstur.is/, sem verður sérstakur útsendingarvefur Formúlu 1 hérlendis. Allar dagsetningar beinna útsendinga á Sýn og brautarlýsingar eru þegar komnar upp á kappakstur.is.

Þá verða markvissar fréttir um Formúlu 1 á Vísi auk þess se, útvarpsstöðin Bylgjan verður með ítarleg innskot um Formúlu 1 á mótshelgum, en margmiðlun upplýsinga um Formúlu 1 verður í hávegum höfð á keppnistímabilinu.