Kvennalandsliðið leikur gegn Finnlandi í maí

Íslenska kvennalandsliðið mun leika tvo vináttulandsleiki gegn Finnum ytra 4. og 7. maí næstkomandi. Leikirnir verða liður í lokaundirbúningi fyrir mikilvægan leik gegn Serbum í Serbíu 28. maí en sá leikur er í undankeppni EM 2009.

Úrslitakeppni þess móts fer einmitt fram í Finnlandi og leika Finnar því ekki í riðlakeppninni þar sem að þeir eru gestgjafar. Leikirnir gegn Finnum fara væntanlega fram á þeim völlum er notaðir verða í úrslitakeppninni sjálfri.

Fyrirhugað er að Finnar endurgjaldi heimsóknina árið 2009 og leiki þá 1-2 vináttulandsleiki hér á landi.

Íslendingar og Finnar hafa fjórum sinnum mæst hjá A-landsliðum kvenna, síðast árið 1997. Finnar hafa þrisvar sinnum farið með sigur af hólmi en Íslendingar einu sinni.

Fyrsti leikur þjóðanna fór fram á Kópavogsvelli árið 1983 í undankeppni EM og var þetta fimmti kvennalandsleikur Íslands frá upphafi. Finnar sigruðu með tveimur mörkum gegn engu.

Eini sigurleikur Íslands gegn Finnum til þessa kom í vináttulandsleik sem leikinn var í Portúgal árið 1996. Íslenska liðið sigraði þá með þremur mörkum gegn einu og skoraði Ásthildur Helgadóttir tvö marka Íslands og Helga Ósk Hannesdóttir eitt.

Af vefsíðu KSÍ