Applerisinn féll á Wall Street

Gengi hlutabréfa í bandaríska tölvuframleiðandanum Apple féll um fimmtán prósent eftir að fyrirtækið birti uppgjörstölur sínar fyrir síðasta ársfjórðung á bandarískum hlutabréfamarkaði í kvöld.

Hagnaður Apple á fjórðungnum, sem er fyrsti fjórðungurinn í bókum fyrirtækisins, nam 1,58 milljörðum bandaríkjadala, jafnvirði rúmra 104 milljarða íslenskra króna. Þetta er 580 milljónum dala meira en á sama tíma í fyrra og besta afkoman í sögu fyrirtækisins. Hagnaður á hlut jókst að sama skapi úr 1,14 dölum í 1,76 dali á hlut. Það er talsvert yfir væntingum markaðsaðila á Wall Street sem spáðu hagnaði upp á 1,61 dal á hlut.

Þá námu tekjurnar 9,6 milljörðum dala sem er 35 prósenta aukning á milli ára.

Spá tölvu- og tæknirisans fyrir yfirstandandi fjórðung er hins vegar öllu svartsýnni og hljóðar upp á 94 sent á hlut en það er í takt við spár manna um samdrátt í einkaneyslu, ekki síst í Bandaríkjunum. Markaðsaðilar reiknuðu hins vegar með 1,08 dölum og tekjum upp á 7,0 milljarða dala. Það er 200 hundruð milljónum dölum meira en fyrirtækið reiknar með.

Þrátt fyrir auknar tekjur á tímabilinu seldi Apple 22,1 milljón iPod mynd- og tónlistarspilara sem er undir lægri mörkum markaðsaðila en 2,3 milljónir iPhone-margmiðlunarsíma.

Við þetta féll gengi bréfa í Apple um 3,5 prósent og um heil 12 prósent í utanþingsviðskiptum eftir lokun fjármálamarkaða í Bandaríkjunum. Gengið hefur jafnað sig lítillega en stendur í rétt rúmum 139 dölum á hlut sem er svipað ról og það var á í september á síðasta ári. Til samanburðar skaust það upp yfir 200 dala markið í fyrsta sinn í sögunni rétt fyrir áramótin síðustu.