Kynþáttafordómar verða ekki liðnir í Formúlu 1

Max Mosley, yfirmaður í Formúlu 1, segir að hart verði brugðist við ef kynþáttafordómar gera vart við sig á ný í kring um íþróttina. Lewis Hamilton, ökumaður McLaren, varð fyrir aðkasti á Spáni um daginn.

"Við munum gera hvað sem við getum til að eyða út svona uppákomum. Ef hér er aðeins um að ræða lítinn hóp fólks, getum við brugðist við strax og upprætt þetta," sagði Mosley.

Hamilton varð fyrir kynþáttaníð þar sem hann var við æfingar í Barcelona um daginn þar sem hann var m.a. kallaður "svartur skítur" að sögn fjölmiðla í Katalóníu.

Hamilton er nú aftur kominn til æfinga á svæðinu en í þetta sinn fékk hann að vera óáreittur og lét vel af veru sinni.

Mosley hefur hótað því að spænska kappakstrinum verði einfaldlega kippt út af dagskránni ef svona lagað kæmi upp aftur. Það sama eigi við um öll önnur lönd.

"Það hefði verið of mikið að bregðast svo hart við strax og við munum gefa þeim tækifæri til að leysa málið. En það er mikilvægt að senda strax út þau skilaboð að kynþáttaníð verði ekki liðin," sagði Mosley.