Evrópusambandið sektar Microsoft um 91 milljarð

Evrópusambandið hefur sektað bandaríska tölvurisann Microsoft um 899 milljónir evra, jafnvirði 91 milljarðs íslenskra króna, fyrir að framfylgja ekki tilmælum sem sambandið setti fyrirtækinu fyrir fjórum árum vegna brota á samkeppnislögum.

Upphæðin kemur til viðbótar við tvær sektir Microsoft á árunum 2004 og 2006 upp á samtals 777 milljónir evra.

Brotin fela í sér að Microsoft lét ekki keppinautum þeirra í Evrópu í té grunnkóða að hugbúnaði sínum, svo sem spilaranum Windows Media Player og tengja saman Internet Explorer-vafrann við stýrikerfið Windows. Þetta þótti brjóta í bága við samkeppnislög og hindra eðlilega samkeppni.

Þetta er fyrsta fyrirtækið til að fara ekki eftir tilmælum Evrópusambandsins og brjóta samkeppnislög með þessum hætti í hálfa öld, að því er Neelie Kroes, framkvæmdastjóri samkeppnismála hjá Evrópusambandinu, segir í samtali við breska ríkisútvarpið í dag.