Tímamótasamningur undirritaður

Í gær var undirritaður tímamótasamningur vegna kostunar á sýningum frá Formúlu 1 kappaksturinn á sjónvarpstöðinni Stöð 2 Sport. Það eru fyrirtækin BYGG, DHL, Lýsing og N1 sem munu færa íslenskum sjónvarpsáhorfendum Formúluna.  Undirritunin fór fram í veglegri Formúluveislu sem haldin var í Perlunni að viðstöddum hátt í 500 manns. Við undirritunina voru Gylfi Óskar Héðinsson frá BYGG, Hermann Guðmundsson frá N1, Ari Edwald frá 365, Halldór Jörgensson frá Lýsingu og Shad Hallam frá DHL.

Beinar útsendingar frá Formúlunni hófust í gærkvöldi á Stöð 2 Sport, þegar sýnt var í fyrsta sinn í íslensku sjónvarpi beint frá æfingum fyrir fyrstu keppni nýrrar mótaraðar sem fram fer í Ástralíu nú um helgina. Stöð 2 Sport mun að sjálfsögðu sýna beint frá tímatökunni, keppninni sjálfri og þar að auki vera með veglega umfjöllun bæði fyrir og eftir keppni.

Formúlan hefur notið sívaxandi vinsælda sem sjónvarpsefni hérlendis sem og um gervallan heim á liðnum árum. Og ekki að ósekju því þar fer íþróttaviðburður sem hefur allt sem framúrskarandi sjónvarpsefni þarf að hafa; snilligáfu ökuþórsins, framsæknustu tækni, og óskipta athygli gervallrar heimsbyggðarinnar. Formúlan nær nú til 75% allra sjónvarpsheimila í heiminum og er áætlað að 2.5 milljarður manna horfa að jafnaði á hvert mót – sem er 3 sinnum meiri fjöldi en fylgist með næst vinsælustu akstursíþróttinni. Og nú fá áhorfendur Stöðvar 2 Sports að njóta veislunnar í allri sinni dýrð og gott betur en það.

Umsjónarmaður Formúlunnar er helstu Formúlusérfræðingur þjóðarinnar, Gunnlaugur Rögnvaldsson, en honum til fulltingis verður einvalalið sérfræðinga og áhugamanna um akstursíþróttir og þá sér í lagi Formúluna.