Hættir Alonso hjá Renault?

Fernando Alonso segir að sér sé frjálst að hætta hjá liði Renault eftir yfirstandandi keppnistímabil í Formúlu 1.

Alonso gekk aftur í raðir Renault fyrir þetta tímabil eftir stormasamt ár hjá McLaren. Hann varð þar áður heimsmeistari ökuþóra hjá Renault árin 2005 og 2006.

"Ég er hjá Renault af því mig langaði að fara að vinna aftur eins og árin 2005-06. Ef ekki á þessu ári, þá á næsta. En ég er með ákvæði í samningi mínum sem gerir það að verkum að ég get farið annað til að vera í aðstöðu til að aka besta mögulega bílnum. Það er klárt í dag að Ferrari er einn besti bíllinn," sagði Alonso í samtali við AS á Spáni.

Orðrómur hefur lengi verið uppi um að Alonso hafi mikið viljað komast til Ferrari og hafi því aðeins undirritað stuttan samning við Renault með það fyrir augum að komast til Ferrari árið 2009.

Þessi ummæli Spánverjans þykja renna stoðum undir þær kenningar og það er ekkert leyndarmál að forseti Ferrari er mikill aðdáandi hins tvöfalda heimsmeistara.

Ekki hefur bætt úr skák að Felipe Massa hjá Ferrari hefur ekki byrjað vel á tímabilinu og hefur fallið úr keppni í tveimur fyrstu keppnunum.