Fimm eiga möguleika á titlinum

Þriðja síðasta Formúlu 1 mót ársins fer fram í Japan um helgina og fyrstu æfingar verða á aðfaranótt föstudags. Fimm ökumenn eiga enn möguleika á titlinum.

Lewis Hamilton er efstur í stigamótinu og er sjö stigum á undan Felipe Massa. Hamilton vann mótið í fyrra í beljandi rigningu og spáð er rigningu um mótshelgina. Akstur í rigningu hefur ekki verið sterkasta hlið Massa og regndekk virðast ekki virka eins vel undir bílum Ferrari og McLaren.

Ferrari hefur gefið það út að Kim Raikkönen eigi að styðja við bakið á Massa í titilbaráttunni, vinna fyrir liðið. Stefano Domenicali framkvæmdarstjóri Ferrari segir að liðið stefni á fyrsta og annað sætið í öllum mótum sem eftir eru.

Hamilton nægir annað sætið í öllum mótum ársins til að landa titli, jafnvel þó Massa verði fyrstur í öllum mótum sem eftir eru. Hlutverk Heikki Kovalainen hjá McLaren verður að verja stöðu Hamilton eftir bestu getu.

Vandamál McLaren og Ferrari er að sjö mismunandi sigurvegarar hafa verið í mótum ársins og tvö síðustu mót hafa ekki fært liðunum tveimur gull. Fernando Alonso vann í Singapúr og Sebastian Vettel vann á Monza. Báðir eru mjög snjallir í rigningu. Robert Kubica á BMW á enn möguleika á titilinum og gæti líka truflaði slag Ferrari og McLaren manna.

Mótið á Fuji brautinni er í beinni útsendingu á Stöð 2 Sport, rétt eins og æfingar og tímatakan, Eknir verða 67 hringir um 4.5 km langa brautina, eða samtals 306 km.