Flugfreyjur syngja jólalög

Flugfreyjukórinn treður upp í Fríkirkjunni í kvöld. Dömurnar skarta nýjum búningum við þetta tækifæri.

„Nú eru þær komnar í nýja búninga. Voða krulludæmi framan á eins og Rúni Júll var með þegar hann var upp á sitt besta," segir Magnús Kjartansson tónlistarmaður. „Svo er ég þarna grimmúðlegur á myndinni. Með svarta hanska eins og ég sé með gervihönd."

Flugfreyjukórinn mun troða upp á aðventukvöldi Flugfreyju­félags Íslands í kvöld í Fríkirkjunni. Magnús lofar sem stjórnandi vönduðu jólaprógrammi þessa sérstæða og flotta kórs sem nú er að verða fimm ára. „Kórinn er orðinn skratti góður þótt ég segi sjálfur frá. Alveg frábærar stelpur," segir Magnús en í Flugfreyjukórnum eru rúmlega tuttugu meðlimir. Kórinn hefur vakið nokkra athygli að undanförnu en hann hefur troðið upp með Stuðmönnum bæði á Gróttuhátíðinni í haust sem og á stórtónleikum í Laugardalshöll nýverið. „Já, slegið í gegn. Honum Jakobi Frímanni fannst í það minnsta mikið til koma. Veit ekki hvort það er vegna þess að hann er með einhvern „búningafetis" - ég held þó ekki. Hann var voðalega hrifinn."

Magnús upplýsir að Jón Rafnsson og Gunnlaugur Briem ætli að spila með kórnum auk Ólafi Finnssyni flugmanni sem ætlar að spila á hljómborð og orgelið.

„Svo verður þarna hugvekja sem Atli Thoroddsen flugmaður mun flytja en faðir hans er sá frægi listflugmaður, Björn Thoroddsen."

Aðventukvöld Flugfreyjufélagsins hófust fyrir nokkrum árum en þá hafði verið höggvið stórt skarð í raðir flugfólks - það orðið fyrir skakkaföllum af ýmsum orsökum. „Þetta byrjaði sem kyrrðarstund en hefur þróast upp í þessi aðventukvöld þar sem flugfólk kemur saman. En allir eru velkomnir. Allir þeir sem vilja heyra flotta jólatónlist," segir Magnús.