Draumur Federer um sigur á Opna franska enn á lífi

Tenniskappinn Roger Federer hélt draumi sínum á floti um að vinna sinn fyrsta sigur á Opna franska mótinu með því að bera sigurorð af Tommy Haas í fimm hrinu rimmu í dag.

Haas vann fyrstu tvær hrinurnar en Federer kom sterkur til baka og tók þrjár næstu, 6-4, 6-0 og 6-2, og komst áfram í átta-manna úrslit.

Hinn 27 ára gamli Federer hefur aldrei unnið Opna franska mótið og það er eina "Grand Slam" mótið af fjórum slíkum sem hann hefur aldrei unnið. Svisslendingurinn hefur tapað þrisvar í úrslitaleik Opna franska mótsins gegn erkióvini sínum Spánverjanum Rafael Nadal. Nadal féll hins vegar óvænt úr keppni í gær þannig að möguleikar Federer að vinna jukust án efa við það.