Mosley blæs á Formúlu 1 krísu

Forseti FIA, Max Mosley segir að umræða um að Formúlu 1 sé í krísu eigi ekki viði rök að styðjast. Hann fundaði með Formúlu 1 liðum í dag, en ekkert samkomulag náðist á milli samtaka Formúlu 1 liða og FIA.

Engu að síður telur Mosley litla hættu á því að Formúlu 1 lið sem hafa hótað að hætta í Formúlu 1 muni gera slíkt. Fimm keppnislið undir hatti FOTA, samtaka Formúlu 1 liða hafa sagt að þau muni ekki keppa eftir nýjum reglum FIA um rekstrarkostnað.

Fundur í dag, í London var til að lægja öldurnarnar á milli FIA og FOTA.

"Ég hef ekki trú á því að þessi lið hætti. Menn segja að það sé krísa. En það er ekki krísa í Formúlu 1. Ný lið sem ætla sér að keppa í Formúlu 1 þurfa að vita stöðuna og við verðum að fara taka ákvörðun í þessum málum", sagði Mosley eftir fundinn í dag.

Ferrari lagði í dag fram kæru fyrir frönskum dómstólum á framgang FIA varðandi næsta keppnistímabil. Ferrari segir að ákvæði í samningi við FIA leyfi ekki þær fyrirætlanir FIA sem í gangi eru.

Sjá nánar um málið