Vinir Sólskins-Kela verða Hollywood-stjörnur

Kvikmyndin Sólskinsdrengur er orðinn aðsóknarmesta heimildarmyndin í íslenskri kvikmyndasögu. Hún sló met Jóns Páls Sigmarssonar um helgina og nálgast óðum tólf þúsund gesta-markið.

Myndin sló met Þetta er ekkert mál nú um helgina en hún fékk tæplega tólf þúsund gesti.„Þetta er náttúrlega alveg ótrúlegt," segir Margrét Dagmar Ericsdóttir, mamma Kela og einn framleiðandi myndarinnar. „Okkur var sagt í byrjun að þetta myndi aldrei gera sig, enginn nennti að horfa á heimildarmynd um einhverfu," bætir Margrét við.

Og það eru skemmtilegar hliðarsögur úr Sólskinsdrengnum. Margrét upplýsir þannig að saga Dov verði brátt kvikmynduð. Dov var hálfgerður örlagavaldur í lífi Kela en hann hafði sótt námskeið hjá hinni indversku Soma og hún hjálpaði honum að tjá sig. Keli fékk síðar meir tíma hjá Soma sem hjálpaði honum mjög mikið. Mamma Dov, Portia Iversen, skrifaði ansi magnaða bók um líf sonar síns sem ber heitið Strange Son. Pabbi Dov er Jonathan Shestack og er þekktur framleiðandi í Hollywood og nú hefur Julia Roberts keypt kvikmyndahandritið og mun að öllum líkindum leika aðalhlutverkið í myndinni.

Þar að auki er í farvatninu kvikmynd byggð á ævi Temple Grandin sem talar um glímuna við einhverfu í Sólskinsdrengnum. Temple er einhver þekktasti búfjárfræðingur Bandaríkjanna og nýtur mikillar virðingar þar vestra. Upplýst hefur verið að Claire Danes leiki hana en meðal annarra leikara í myndinni má nefna David Strathairn sem tilnefndur var til Óskarsverðlauna fyrir leik sinn í George Clooney-myndinni, Good Night, and Good Luck. Margrét gleðst að sjálfsögðu yfir þeim mikla áhuga sem virðist vera að vakna á einhverfu. Aðspurð hvort ekki sé bara Hollywood-mynd um Kela í bígerð, segir Margrét svo ekki vera. „En hins vegar hafa erlendir dreifingaraðilar verið mjög áhugasamir um myndina og þessi áhugi skemmir ekkert fyrir okkur." - fgg