Barrichello beit frá sér í Valencia

Rubens Barrichello var ökumanna sprettharðastur á götum Valencia í dag á Brawn bíl, en McLaren ökumennirnir Heikki Kovalainen og Lewis Hamilton voru skammt undan.Munaði liðlega 0.1 sekúndu á köppunum þremur.

Búist er við hörðum slag í mótinu á Valencia, sem svipar til mótsins í Mónakó, en fjöldi listisnekkja liggur á hafnarbakkanum sem keppnin fer fram á og eru 25 beygjur á brautinni sem ökumenn takast á við.

Nýr ökumaður Ferrari, í stað Felipe Massa, Ítalinn Luca Badoer var síðastur allra og meira en 3 sekúndum á eftir fyrsta bíl. Hann hefur ekið yfir 150.000 km á æfingum með Ferrari, en keppti í Formúlu 1 fyrir tíu árum.

Heimamennirnir Fernando Alonso og Jamie Alguersuari voru í níunda og þrettánda sæti, en mikil spenna er fyrir þeim á heimavelli. Adrian Sutil á Force India náði sjötta besta tíma, en hann hefur oft verið fljótur á götubrautum. Bíll hans er verulega endurbættur frá síðasta móti.

Sýnt er frá æfingum keppnisliða í sérstökum þætti á Stöð 2 Sport kl. 20.30 í kvöld.

Sjá tíma og brautarlýsingu