Leitið og þér munið finna?

Netverjar lesa vefsíður með öðrum hætti en ritmál. Þeir skanna síður og meta hvort þar sé að finna umbeðnar upplýsingar. Því þurfa vefstjórar að fanga athygli gesta sinna við komuna og gefa þeim vonir um, að spurningum þeirra verði svarað á viðeigandi undirsíðum.

Flestir notendur koma inn á fyrirtækjasíðu í upplýsingaleit. Þeir skanna forsíðuna og slá á þann tengil, sem virðist líklegastur til að vísa á viðeigandi upplýsingar. Þeir eru að flýta sér og vilja aðeins lesa nógu mikið til að komast að umbeðnum upplýsingum.

Því þarf að skipuleggja síðuna þannig, að notandinn komist á áfangastað eins fljótt og kostur er. Forsíðan þarf nauðsynlega að hafa vel uppsetta tengla á helstu undirsíður, flokkaða eftir helstu efnisatriðum. Jafnframt þarf að hafa þar leitarmöguleika og örstutta kynningu á innihaldi vefsíðunnar.

Með þetta í huga þarf forsíðan að vera auðskilin, einföld og vel skipulögð. Óþarfa litadýrð, mælskuæfingar, hreyfimyndir eða auglýsingar beina sjónum notenda frá þeim upplýsingum, sem þeir þurfa á að halda til að komast á áfangastað.

Notendur verða að geta fylgt tenglunum nánast umhugsunarlaust. Í hvert skipti, sem þeir þurfa að stöðva för til að hugsa, aukast líkur á að þeir fari á aðra síðu.

Forsíðan er lykill vefsíðunnar og mælistika á gæði hennar. Ef notendum líkar ekki við hana við fyrstu kynni, fara þeir annað.