Danskir bankar fá skellinn af gjaldþrotum Landic-félaga

Nokkrir danskir bankar munu að öllum líkindum fá skell af gjaldþroti þriggja dótturfélaga Landic Property í Danmörku. Þetta kemur fram í frétt frá fréttastofunni Direckt.

„Við getum staðfest að nokkrir danskir bankar eru meðal kröfuhafanna," segir Viðar Þorkelsson forstjóri Landic Porperty í samtali við Direckt en hann vill ekki segja um hve háar upphæðir sé að ræða.

„Ég get ekki á þessari stundu tjáð mig um stærðina á þessum skuldum. Hún fer eftir því hvernig málin þróast," segir Viðar.

Fram kemur í fréttinni að Landic Property hafi komist í sviðsljósið í Danmörku á síðasta ári er félagið þurfti að taka aftur við Keops Development því að hið gjaldþrota Stones Invest hætti við kaupin á Keops.

Auk Keops voru það Landic Property A/S og Landic Investment A/S, sem í dag lögðu fram beiðni um gjaldþrotaskipti hjá dómstólum í Kaupmannahöfn eins og sjá má í annarri frétt hér á síðunni.