Seldi fyrstu samuræ-bréfin eftir að Kaupþing eyðilagði markaðinn

Barclays bankinn hefur gefið út og selt fyrstu samuræ-bréfin í ár en Kaupþing eyðilagði markaðinn með slík bréf í október þegar Kaupþing varð fyrsti evrópski bankinn sem gat ekki borgað af sínum samuræ-bréfum.

Samuræ-bréf eru nákvæmlega eins og krónubréf nema þau eru gefin út í japönskum jenum. Í frétt um málið á Bloomberg segir að útgáfa Barclays nemi 52,7 milljörðum jena eða tæplega 72 milljörðum kr. Hluti af bréfunum bera fasta 2,09% vexti og hluti er með fljótandi vexti, það er sex mánaða Libor, með 1,43% álagi.

Markaðurinn með samuræ-bréfin varð fyrir miklu áfalli er bandaríski Lehman Brothers varð gjaldþrota í september á síðasta ári en hökti þó áfram. Þegar greiðslufall varð svo á bréfum Kaupþings mánuði síðar hrundi markaðurinn algerlega.

Yasuhiro Matsumoto greinandi hjá Shinsei Securities segir í samtali við Bloomberg að fjárfestar séu nú að endurmeta samuræ markaðinn þar sem kjörin eru betri en á nýlegum skuldabréfaútgáfum japanskra fyrirtækja.

Hiroshi Harada hjá tryggingarfélaginu Dai-Ichi Mutual í Tókýó segir að kjörin séu viðunandi en umfangið á sölu Barclays hafi verið minna en hann átti von á. Það sýni kannski að fjárfestar eru enn varkárir gangvart svona bréfum sem eru ekki með ríkisábyrgð að baki útgáfunnar.