Mikið tap á rekstri Storebrand í Noregi

Blóðrauðar tölur í uppgjöri norska tryggingarfélagsins Storebrand hafa komið sérfræðingum í opna skjöldu enda er tap félagsins á fyrsta ársfjórðungi ársins langt umfram væntingar þeirra.

Tapið nam 733 milljónum norskra kr. eða tæplega 14 milljarðar kr. Samkvæmt frétt um málið á vefsíðunni e24.no töldu sérfræðingar að tapið yrði ekki meira en rúmlega 160 milljónir norskra kr.

Kaupþing er sem stendur næststærsti hluthafinn í Storebrand með 5,5% hlut og Arion Custody, sem er í eigu Kaupþings er fjórði stærsti hluthafinn með 4,5% hlut.

Mestan hlut af tapinu má rekja til óskráðra hlutabréfa í eigu Storebrand og fasteignasjóðs á vegum félagsins.

Idar Kreutzer forstjóri Storebrand segir að óróleikinn á fjármálamörkuðum hafi myndað stórar sveiflur í afkomu félagsins en grunnur þess sé þó áfram traustur. Hann sér ljósa punkta í framtíðinni og nefnir, í tilkynningu um uppgjörið, að söluþróunin sé jákvæð, tekjur fari vaxandi og mikil hagræðing sé framundan.