United er frábært lið - en við höfum Mourinho

Miðjumaðurinn Sulley Muntari hjá Inter Milan þekkir lið Manchester United betur en margir félagar hans eftir að hafa spilað með Portsmouth undanfarin misseri.

Muntari gekk í raðir Inter í sumar en það var einmitt hann sem skoraði sigurmark Portsmouth gegn United í fjórðungsúrslitum enska bikarsins á síðustu leiktíð.

"United er frábært lið - eitt af þeim bestu," sagði Ganamaðurinn í samtali við Sky. "United á samt erfiðan leik fyrir höndum gegn okkur því við erum líka með hörkulið. United er með frábæra framlínu en við erum með gott leikskipulag og við höfum Jose Mourinho. Hann er besti þjálfari í heimi að mínu mati," sagði Muntari.