Alþjóðabankinn: Lausn á kreppunni ekki handan við hornið

Lausn á efnahagskreppunni er ekki handan við hornið. Þetta eru skilaboð bankastjóra Alþjóðabankans til leiðtoga helstu iðnríkja heims sem nú eru komnir saman til fundar á Ítalíu.

Í bréfi sem Robert Zoellick bandastjóri Alþjóðabankans sendi leiðtogunum segir að inngrip seðlabanka og ríkisstjórna virðist hafa stöðvað hrapið í hagkerfum heimsins með því að styrkja fjármálamarkaði og auka eftirspurn.

Zoellick segir að engu að síður verði árið 2009 hættulegt ár og að alls sé óvíst um hagvöxt á næsta ári. Hann segir að hann geri sér grein fyrir því að sum hinna þróaðri iðnríkja geri því nú skóna að dæmið sé að snúast við.

Því fari hinsvegar fjarri að svo sé um þróunarlöndin sem enn eigi eftir að þola miklar þjáningar. Alþjóðabankinn áætlar að landsframleiðsla í þróunarlöndunum að Kína og Indlandi frátöldum muni minnka um 1.6 prósent.

Zoellick segir í bréfi sínu að eins prósents samdráttur í landsframleiðslu geti fest allt að tuttugu milljónir manna í sárri fátækt. Iðnríkin megi því ekki gleyma þróunarlöndunum þótt þröngt sé fyrir dyrum heimafyrir.