Umfjöllun: Framarar í bikarúrslitin eftir 1-0 sigur á KR

Framarar eru komnir í bikarúrslitaleikinn eftir 1-0 sigur á KR í undanúrslitaleik liðanna á Laugardalsvellinum í dag. Það var varamaðurinn Joseph Tillen sem tryggði Fram sigurinn með marki tólf mínútum fyrir leikslok.

Þetta var fjórtándi sigur Framara í röð í undanúrslitaleik í bikarnum en Safamýrarliðið tapaði síðast í undanúrslitaleik bikarsins árið 1971. Fram hefur aftur á móti ekki orðið bikarmeistari í tuttugu ár eða síðan að þeir unnu KR 3-1 í bikarúrslitaleiknum 1989.

KR-ingar náðu ekki að sýna sinn besta leik á Laugardalsvellinum í dag en þeir voru búnir að vera á mikilli siglingu í deildinni og það bjuggust flestir við því að bikarmeistararnir kæmust í úrslitaleikinn. Framliðið er hinsvegar sýnd veiði en ekki gefin og sönnuðu það enn einu sinni í Laugardalnum í dag.

Framarar sýndu mikla þolinmæði í þessum leik, þeir lágu aftarlega, gáfu fá færi á sér og beittu síðan hættulegum skyndisóknum. Þegar upp var staðið voru það Framarar sem áttu hættulegustu færi leiksins þrátt fyrir að vera miklu minna með boltann allan leikinn.

KR-liðið byrjaði leikinn af miklum krafti og hafði öll völd á vellinum fyrstu tuttugu mínúturnar. Þorvaldi Örlygssyni, þjálfari Fram, fór þá að hætta lítast á blikuna og kom að hliðarlínunni og kallaði skipanir til sinna manna. Þessi ráð þjálfarans virkuðu vel því Framliðið komst eftir þetta meira inn í leikinn.

KR-liðið var samt miklu meira með boltann en tókst ekki oft að opna Framvörnina. Þegar KR-ingar komust inn á hættusvæðið voru skotin oftast slök ef þau þá komu yfir höfuð. Óskar Örn Hauksson reyndi mikið í upphafi leiks en annars hafa sóknarmenn KR-liðsins oft átt miklu betri dag.

Sigurmark Joseph Tillen kom eftir skyndisókn þar sem Jón Guðni Fjóluson vann boltann á miðjunni og átti frábæra sendingu inn fyrir hægri bakvörð KR-inga og inn á Tillen sem afgreiddi boltann glæsilega í markið. Þetta var ekki fyrsta skyndisókn Framara í leiknum sem skapaði mikla hættu. Markið kom á 78. mínútu leiksins og í kjölfarið jókst KR-pressan nokkuð.

Logi Ólafsson, þjálfari KR, beið með að skipta Guðmundi Benediktssyni inn á þar til að Framarar voru komnir yfir. Guðmundur var fljótur að leggja upp þrjú færi fyrir félaga sína en eins og áður í leiknum þá vantaði allt bit í sóknarmenn liðsins þegar þeir voru komnir í ákjósanleg skotfæri.

Framarar fögnuðu sigrinum vel í leikslok enda mikil vinnusigur sterkrar liðsheildar að baki. Framörum tókst frábærlega að loka á eitt heitasta liðið í íslenskum fótbolta í dag. KR-liðið fann engin svör og fyrir vikið mun enginn bikar fara í Vesturbænum þetta sumarið.

Leiknum var lýst beint á Boltavaktinni og hér má lesa lýsingu leiksins: Fram - KR

Fram-KR 1-0

1-0 Joseph Tillen (78.)

Laugardalsvöllur. Áhorfendur: 1946

Dómari: Þorvaldur Árnason (8)

Skot (á mark): 6-20 (3-4)

Varin skot: Hannes 4 - Andre 2.

Horn: 2-6

Aukaspyrnur fengnar: 11-7

Rangstöður: 0-1

Fram (4-1-3-2):

Hannes Þór Halldórsson

Daði Guðmundsson

Auðun Helgason

Kristján Hauksson

Sam Tillen

Ingvar Þór Ólason

Heiðar Geir Júlíusson

(62., Joseph Tillen)

Jón Guðni Fjóluson

Halldór Hermann Jónsson

Hjálmar Þórarinsson

(87., Paul McShane )

Almarr Ormarsson

KR (4-3-3):

Andre Hansen

Ásgeir Örn Ólafsson

Grétar Sigfinnur Sigurðarson

Mark Rutgers

Guðmundur Reynir Gunnarsson

Bjarni Guðjónsson

Baldur Sigurðsson

Atli Jóhannsson

Gunnar Örn Jónsson

(80., Guðmundur Benediktsson)

Björgólfur Takefusa

óskar Örn Hauksson