Engin tilboð í Benzema

Forráðamenn franska úrvalsdeildarfélagsins Lyon halda því fram að félagið hafi ekki móttekið nein tilboð frá Manchester United, Arsenal eða Real Madrid í sóknarmanninn Karim Benzema.

Því hefur verið lengi haldið fram að Benzema sé á leið frá Lyon í sumar þó svo að umboðsmaður hans hafi sagt að sjálfur vilji Benzema vera áfram í heimalandi sínu til að einbeita sér fyrir HM 2010.

United var fyrir skömmu sagt hafa boðið 27 milljónir punda í Benzema en talsmaður Lyon segir það rangt og að það þyrfti mun meira til en 30 milljónir til að félagið myndi selja hann.

„Við höfum ekki fengið nein tilboð frá þessum félögum og heyrðum fyrst í Real Madrid í síðustu viku."