Öll Norðurlöndin, nema Noregur, komin í kreppu

Öll Norðurlöndin, nema Noregur, eru nú komin í kreppu og það af dýpri gerðinni. Einna verst er ástandið í Svíþjóð, ef Ísland er undanskilið, en landsframleiðslan þar á fjórða ársfjórðungi síðasta árs hefur ekki minnkað jafnmikið síðan skráning hennar hófst.

Í umfjöllun Reuters um málið segir að landsframleiðsla Svíþjóðar hafi minnkað um 4,9% á ársfjórðungnum m.v. sama tímabil árið á undan. Sökum þessa gerir Peter Kaplan greinandi hjá RBS ráð fyrir að stýrivextir í Svíþjóð geti lækkað allt niður í 0.1%.

Í Danmörku minnkaði landsframleiðslan um 3,9% á fjórða ársfjórðungi síðasta árs sem þýddi að fyrir árið í heild minnkaði hún um 1,3%. Leita verður aftur til ársins 1955 til að finna sambærilegan samdrátt í Danmörku.

Kreppan varð einnig staðreynd í Finnlandi á fjórða ársfjórðungi ársins er landsframleiðslan minnkaði um 2.4%. Er þetta mesta minnkun landsframleiðslu þar í landi á undanförnum 16 árum.

Í Noregi hinsvegar varð samdrátturinn aðeins 0,2% eða vel undir kreppuviðmiðunum. Hinsvegar er búist við að Noregur bætist í hóp frændþjóða sinna hvað kreppuna varðar síðar á þessu ári.

Og við þekkjum stöðuna á Íslandi en búist er við að landsframleiðslan hér minnki um a.m.k. 10% á þessu ári.