Besta hljómplata U2 í átján ár

Tólfta hljóðversplata U2, No Line on the Horizon, fær fimm stjörnur hjá Dave Fricke, gagnrýnanda bandaríska tímaritsins Rolling Stone. Hann segir plötuna þá bestu frá sveitinni í átján ár, eða síðan Achtung Baby kom út.

„No Line on the Horizon er fyrsta platan frá U2 í næstum fimm ár og þeirra besta hvað varðar textagerð og góðar melódíur síðan Achtung Baby kom út 1991," segir í umsögninni. „Bono syngur um Guð, sektarkennd, ást og hryðjuverk og gerir líka grín að sjálfum sér eins og oft áður," segir Fricke og á þar við söng hans í laginu Stand Up Comedy: „Standið upp fyrir rokkstjörnum. Passið ykkur á litlum mönnum með stórar hugmyndir."

Bjagaður gítarleikur The Edge og þéttur trommuleikur Larry Mullen Jr. þykir einnig áberandi á plötunni, sem kemur út 2. mars. Bíða hennar margir með mikilli eftirvæntingu enda hefur U2 lengi verið talin „stærsta" hljómsveit heimsins.

Gagnrýnandi breska dagblaðsins The Daily Telegraph er einnig hrifinn af nýju plötunni: „Þetta er miklu frekar viðburður en plata. Alveg eins og með The Unforgettable Fire og Achtung Baby þá er No Line on the Horizon djörf, falleg og vel ígrunduð enduruppgötvun á tónlist U2."

Til að fagna útkomu plötunnar og berjast fyrir komu U2 til Íslands verða haldnir tónleikar á Nasa 7. mars. - fb