Kreppan heldur hjónaböndum gangandi vestan hafs

Þegar garðurinn er auður slást hestarnir og kreppur eru sem regla tímar skilnaða. Hinsvegar hefur fjármálakreppan að þessu sinni haft þau áhrif að bandarísk hjónabönd halda lengur en áður. Kannski sökum þess að hjón hafa ekki lengur efni á að skilja.

Þanig hefst umfjöllun á business.dk um nýja könnun meðal skilnaðarlögfræðinga í Bandaríkjunum. Þeir mynda samtökin The America Academy of Matrimonial Lawyers (AAML) og telja um 1.600 meðlimi.

Samkvæmt könnun AAML segja 57% félagsmanna að skilnaðarmálum hafi fækkað tölurvert hjá þeim frá því að kreppan skall á í fyrra. Aðeins 14% merkja aukningu skilnaðarmála hjá sér.

„Þegar fólk þarf að velja á milli þess að eyðileggja hjónabandið á tímum niðurskurðar og ótryggrar framtíðar í efnahagsmálum og að halda því gangandi velja mörg hjón að reyna aftur eða bíða með skilnaðinn þar til efnahagsstorminn hefur lægt að nýju," segir Gary Nickelson formaður AAML í samtali við Reuters.