Traust eykst á evrópskum markaði

Evrópski seðlabankinn mun lána 589 bönkum og fjármálafyrirtækjum á evrusvæðinu 75,2 milljarða evra, jafnvirði rúmra 13.700 milljarða króna, til næstu tólf mánaða.

Þetta er tæplega helmingi lægri upphæð en fjármálasérfræðingar höfðu almennt reiknað með að bankarnir myndu sækja sér. Bloomberg-fréttaveitan segir þetta merki um að traust sé að aukast á millibankamarkaði.

Seðlabankinn setti prentvélarnar í gang og opnaði hirslur sínar í ársbyrjun með það fyrir augum að blása lífi í lánveitingar til einstaklinga og fyrirtækja en útlán drógust hratt saman við upphaf fjármálakreppunnar.

Í kjölfarið lækkuðu stýrivextir helstu seðlabanka heims hratt og eru vextir evrópska seðlabankans nú eitt prósent. Bloomberg bendir jafnframt á að vextir á millibankamarkaði á evrusvæðinu hafi lækkaði mjög, farið úr 5,24 prósentum fyrir ári niður í 0,74 prósent nú. Þeir hafa aldrei verið lægri.

Þetta var í annað sinn sem bönkum á evrusvæðinu gafst kostur á að sækja sér fé með þessum hætti í skugga hremminga og vantrausts á fjármálamörkuðum. Þeir fengu 442 milljarða evra í júní síðastliðnum og verður lánaglugginn opnaður í þriðja sinn í árslok. - jab