Þorsteinn farinn að þjálfa 3. flokk hjá KR

Þorsteinn Halldórsson hefur verið ráðinn þjálfari 3. flokks karla hjá KR ásamt bróður sínum Valþóri Halldórssyni en Þorsteinn tók við liði Þróttar í Pepsi-deild karla um mitt sumar en náði ekki að bjarga liðinu frá falli. Þorsteinn verður aðalþjálfari 3. flokks og Valþór aðstoðarþjálfari en þetta kemur fram á heimasíðu KR-inga.

Þeir bræður hafa báðir leikið með meistaraflokki KR og eru því að snúa aftur á heimaslóðir sínar. Þorsteinn lék 121 leik með KR á árunum 1988 til 1992 og Valþór lék 17 leiki árin 2002 og 2003. Undanfarin ár hafa þeir báðir þjálfað hjá Þrótti.