Ross Brawn: Button mjög hæfileikaríkur

Bretinn Ross Brawn gerði Michael Schumacher að sjöföldum meistara með Benetton og Ferrari. Hann hefur trú á að Jenson Button geti orðið meistari í ár. Hann er með 12 stiga forskot í stigakeppni ökumanna.

"Button er sérstakur og hefur sýnt það. Það eru engin læti þegar hann keyrir, hann fer vel með dekkin og bílinn. Þegar ég var hjá Ferrari sagði Michael Schumacher að Button væri hæfileikaríkur. Núna hefur hann loks tækifæri til að sýna hvað í sér býr", sagði Brawn. Button vann þriðja sigur sinn í fjórum mótum á sunnudaginn. Hann er með 31 stig í stigakeppni ökumanna, en félagi hans hjá Brawn 19.

"Button er líka að fá aukið sjálfstraust að skilja að hann getur unnið. Slíkt er ekkert sjálfgefið og Button veit að hann er með tækifæri í höndunum. Það eru þó 13 mót eftir í meistaramótinu og við verðum að sækja mót frá móti. Við getum ekkert slakað á og önnur lið munu þróa bíla sína hratt til að krafsa í forystu okkar;" sagði Brawn.