Þriggja manna slagur um Formúlu 1 titilinn

Eftir Formúlu 1 mót helgarinnar er ljóst að slagurinn um meistaratitilinn í lokamótunum tveimur verður á milli þriggja ökumanna. Sebastian Vettel steig stórt skref með því að vinna á Suzuka brautinni í Japan og komst 9 stig nær Jenson Button sem hefur forystu í stigamótinu.

Button gæti orðið meistari í næsta móti sem er í Brasilíu, en miðað við gengi hans að undanförnu er það ólíklegt. Hann varð í áttunda sæti í gær og félagi hans Rubens Barrichello varð sjöundi. Þeir töpuðu því miklu af forskoti sínu á Vettel.

"Vettel var með mjög fljótan bíl og það er mest um vert fyrir mig að gera ekki mistök. Jafnvel þó Vettel eða Barrichello ynnu í Brasilíu, þá yrði ég með 4-5 stiga forskot", sagði Button. Hann vann sex af sjö fyrstu mótum ársins, en síðan ekki sögunar meir.

"Það er ekki alslæmt að hafa bara fengið eitt stig í Japan. Ég fer til Brasilíu fullur bjartsýni, en Vettel og Barrichello á heimavelli verða erfiðir viðureignar. Brawn liðið getur tryggt sér titil bílasmiða með því að ná í hálft stig í næsta móti og menn geta verið stoltir af gangi mála", sagði Button.

Í vetur leit ekki út fyrir að Barrichello og Button myndu keppa, en á síðustu stundu tókst að bjarga fyrrum Honda liðinu og stofna Brawn liðið. Nú er liðið með forystu í stigakeppni bílasmiða og Button í stigamóti ökumanna.

Sjá stigagjöfina