Auðugustu Danirnir hafa tapað 4.000 milljörðum

Fimmtíu auðugustu fjölskyldur og einstaklingar í Danmörku hafa tapað tæpum 170 milljörðum danskra kr. eða um 4.000 milljörðum kr. á einu ári. Verst hefur árið verið fyrir Mærsk fjölskylduna sem hefur tapað hátt í þriðjungi heildarupphæðarinnar.

Berlingske Tidende hefur birt árlegan lista sinn yfir auðugustu Danina og er listinn að þessu sinni litaður af gífurlegu fjárhagstapi þessa fólks í efnahagskreppunni. Á listanum í fyrra voru sameiginleg auðæfi 50 auðugustu Dananna metin á 446 milljarða danskra kr. en í ár hafa þessi auðæfi dregist saman í 277 milljarða dkr.

Mærsk Mc-Kinney Möller fer verst út úr árinu en tap þeirrar fjölskyldu stafar einkum af hlutabréfaeignum hennar auk því að skiparekstur hefur verið mjög erfiður á þessu tímabili. Minnka auðæfin úr 133 milljörðum danskr kr. og niður í 82 milljarða dkr.

Hlutfallslega fer þá Clausen fjölskyldan verst út úr kreppunni en hún er eigandi Danfoss. Auðæfi hennar í ár eru tæpur þriðjungur af því sem þau voru í fyrra. Fóru úr 31 milljarði danskra kr. niður í rúma 9 milljarða dkr.

Af öðrum þekktum fjölskyldum sem hafa tapað stórt eru Kirk Kristiansen (Lego) sem hefur tapað tæpum 12 milljörðum dkr. og Due Jensen (Grundfos) sem hefur tapað meir en helmingi af sínum auðæfum, fer úr 29 milljörðum og niður í 14 milljarða danskra kr.