Starfsfólki skókeðju JJB Sports sagt upp

438 starfsmönnum tveggja fyrirtækja í eigu bresku íþróttavörukeðjunnar JJB Sports hefur verið sagt upp, að kröfu KPMG í Bretlandi, sem fer með greiðslustöðvun verslananna. Íslenska ríkið er einn stærsti hluthafi JJB Sports eftir að Kaupþing leysti til sín tæpan þriðjungshlut Exista og Chris Ronnie með veðkalli.

Starfsmennirnir unnu allir hjá skóverslunum JJB Sports, Original Shoe Company og Qube, sem óskuðu eftir greiðslustöðvun í síðustu viku. Rúmum helmingi verslana Original Shoe Company hefur nú verið lokað en átta af þrettán verslunum Qube.

Samkvæmt ársreikningi JJB Sports töpuðu þessi tvö félög samtals fimmtán milljónum punda á síðasta ári, eða tæplega 2,5 milljörðum króna.

Breska ríkisútvarpið hefur eftir Richard Fleming hjá KPMG, í dag, að talsvert sé síðan legið hafi fyrir að skóverslanirnar hafi verið reknar með tapi í skugga mjög erfiðra aðstæðna í breskri smásöluverslun um þessar mundir. Því hafi fátt annað komið til greina en að loka hluta þeirra.

Eins og margoft hefur komið fram á JJB Sports í miklum erfiðleikum og reynir nú að selja heilsuræktarstöðvar sínar, Fitness Club, með það fyrir augum að bæta fjárhagsstöðuna.

Talið er að salan geti skilað um 50 milljónum punda og verði í framhaldinu hægt að gera að miklu leyti upp skuldir verslunarinnar gagnvart lánadrottnum.