Fékk 130 milljarða kr. inn á bankareikning sinn vegna mistaka

Það hlýtur að vera draumur allra í fjárhagskreppunni að fá óvænt tæpa 130 milljarða kr. setta inn á bankareikninginn sinn. Það gerðist hjá hinni sænsku Corneliu Johansson sem fékk þessa upphæð setta inn á reikning sinn hjá Nordea bankanum.

Kærasti Corneliu segir í samtali við Göteborg Posten að samkvæmt yfirliti hafi innistæðan á reikningi Corneliu allt í einu sýnt stöðu upp á rúma 10 milljarða sænskra kr.. Og útskýringin sem fylgdi með var að þetta væri uppgjör eftir skortsölu.

Cornelia og kærastinn biðu í nokkra daga og þegar ekkert frekar gerðist ákváðu þau að hafa samband við Nordea og greina þeim frá þessari færslu. Kom þá í ljós að bankinn hafði gert tæknileg mistök og sett þessa upphæð inn á rangan reikning.

Það fylgir með sögunni að samkvæmt sænskum lögum ber viðkomandi ekki skylda til að tilkynna um mistök sem þessi en að hinsvegar sé ólöglegt að nota peninga sem viðkomandi veit að hann á ekki.