Michael Schumacher ætlar sér titilinn strax

Michael Schumacher ætlar ekkert að gefa eftir í Formúlu 1 á næsta ári en hann hefur gert þriggja ára samning við Mercedes sem kunnugt er. Hann ætlar sér einfaldlega titilinn.

Schumacher er sannur sigurvegari og mun eflaust auka áhorf á Formúluna. Hann hefur unnið sjö meistaratitla og ætlar sér þann áttunda. Hann verður elsti ökumaður í Formúlunni, 41 árs gamall.

„Ég hef unnið titilinn sjö sinnum og liðið mitt vann báða titlana á síðasta ári, ég veit því hvers er ætlast til af mér. Nú þegar Mercedes er með lið í Formúlunni mun ekkert annað koma til greina en titilinn.“

„Það er það sem við stefnum að en við verðum að standa okkur í stykkinu og vinna vinnuna hennar. Ég get í hreinskilni sagt ekki beðið eftir 1. febrúar þegar við munum keyra bílinn opinberlega í fyrsta sinn.“

Schumacher hætti í Formúlunni árið 2006 eftir að hafa keppt í 250 keppnum, þar af 180 fyrir Ferrari. Hann vann 91 keppni, 71 fyrir Ferrari.