Ecclestone til varnar Ferrari gegn FIA

Bernie Ecclestone hefur komið til varnar Ferrari eftir dæmalausa yfirlýsingu Max Mosley hjá FIA í síðustu viku. Þar gaf forseti FIA það í skyn að Formúla 1 gæti léttilega séð á eftir Ferrari, ef liðið vildi hætta í Formúlu 1.

Luca Montezemolo forseti Ferrari hafði áður sagt að hugmyndir Mosley um niðurskurð rekstrarkostnaðar á næsta ári væru óraunhæfar og ekki í takt við raunveruleikann. "Það væri sárt að missa Ferrari, þetta er landslið Ítalíu. En stjórn fyrirtækisins hlýtur að vilja skera rekstrarkostnað niður eins og önnur lið", sagði Mosley, en Montezemolo finnst óraunhæft að kostnaður við rekstur liðs á næsta ári verði 40 miljón sterlingspund í stað 250-300 eins og nú er. Mosley vill tvær útgáfur bíla á næsta ári, fyrir efnameiri lið og efnaminni.

"Það vilja allir minnka rekstrarkostnað, líka Ferrari. En menn hafa áhyggjur af þeim tölum sem hafa verið nefndar og líka þessari hugmynd um tvær útgáfur bíla. Þetta er eitthvað sem verður að semja um. En Mosley fær ekki að eyðileggja möguleika Ferrari í Formúlu 1. Ég leyfi því ekki að gerast. Engin skyldi rífast opinberlega við Mosley, hann er klókur. Það vinnur hann engin í rökræðum", sagði Ecclestone.