Gagnrýnir stjórnendur Kaupþings harkalega

Engir skynsamir bankastjórnendur hefðu lánað eins miklar fjárhæðir til jafn fárra viðskiptavina og Kaupþing gerði, fullyrðir Tony Shearer, fyrrverandi forstjóri Singer & Friedlander, í grein sem birtist á vef breska blaðsins Telegraph í gær.

Shearer fjallar þar um lánagögn Kaupþings sem voru opinberaðar á vefnum Wikileaks.org fyrir röskri viku siðan. Í gögnunum eru tilgreindir stærstu lántakendur hjá Kaupþingi. Þar kemur fram, eins og fréttastofa hefur áður greint frá, að 10 stærstu lántakendur fengu ríflega 1500 milljarða í lán frá bankanum.

Shearer segir að í langfæstum tilfellum hafi öryggis verið gætt. Mörg af lánunum hafi ekki verið tryggð með neinu nema hlutum í Kaupþingi, sem geti varla talist nokkur trygging. Þá segir Shearer að því hafi verið illa lýst og af mikilli ónákvæmni hvaða möguleikar væru á því að lánin fengust endurgreidd.

Þá gagnrýnir Shearer breska fjármálaeftirlitið fyrir að hafa ekki komið í veg fyrir að Kaupþing eignaðist Singer & Friedlander og visa ábyrgðinni á viðskiptunum á íslenska fjármálaeftirlitið. Hann segir að breska fjármálaeftirlitið hefði átt að aðstoða íslenska fjármálaeftirlitið við að sinna eftirlitsskyldum sínum og vara stjórnendur þess við þeirri hættu sem steðjaði að.