Forráðamenn AC Milan sannfærðir um að fá Beckham

Flest virðist nú benda til þess að AC Milan sé líklegasti áfangastaður stórstjörnunnar David Beckham hjá LA Galaxy þegar MSL-deildin fer í frí frá nóvember og fram í mars.

Hinn 34 ára gamli Beckham var sem kunnugt er í láni hjá AC Milan á síðasta keppnistímabili og Umberto Gandini, stjórnarmaður hjá ítalska félaginu, hefur staðfest að félagið hafi hug á því að fá kappann að nýju þegar félagaskiptaglugginn opnar að nýju í janúar.

„Við erum í góðu sambandi við Beckham og talsmenn og umboðsmenn hans sem og yfirmenn MSL-deildarinnar. Við erum mjög opnir fyrir endurkomu hans til Mílanó og vonumst til þess að ganga frá samningum. Hann er frábær leikmaður og því viljum við gjarnan fá hann aftur," segir Gandini í viðtölum við ítalska fjölmiðla í dag.